مؤنس زهيرى يكتب على باب الوطن
----------------------------دائما و ابدا ما تبدأ القصة بالحوار التالي ..
- يعني هو زكي بك احسن منك في ايه ؟؟
- احسن مني في ايه .. دا مصانعي تضرب مصانع ابوه بالجزمه .. انت بتتكلم ازاي .. دا انا رأسمال شركاتي اده سبع مرات بالميت ..
- يا باشا انا ما اقصدش المصانع و الشركات .. انا قصدي الجورنال اللي عمله و كل واحد بقي ماسكه بيقرا فيه في كل حته في البلد ..
- يا بني انا ماليش في الجرايد و الكلام الفارغ ده .. انا شغلتي الفلوس .. الفلوس عندي و في ايدي بتولد فلوس ..
- ما انا قصدي الفلوس يا باشا .. الجورنال اهم من الفلوس .. هو اللي بيجيب الفلوس .. و بعدين يا باشا انت صلاة النبي يعني لامؤاخذه مش ناقص فلوس .. انت عاوز تظهر و تبان في المجتمع انك صاحب رسالة ..
- رسالة !! قصدك رسالة بضاعة يعني ؟؟
- يعني .. حاجه زي كده يا باشا .. ما هو اللي احنا حنشتغل فيه بضاعة برضه ..و هي دي الموضة اليومين دول ..
- هات م الاخر .. عاوزني اعمل ايه يعني ؟؟
- جورنال .. تعمل جورنال يا باشا يبقي معروف انك صاحبه و كام واحد من الشباب المتخرج جديد و مش لاقي شغل يعملوا اجدعها جورنال .. و كام صحفي م اللي مشهورين يكتبوا كام مقال م التقال يهاجمو اي حد كبير في البلد و اعمل لك بعد كده خناقة معاهم و نمشيهم و حسبة اتنين ثلاثه مليون .... و اسمك يبقي زي الطبل في السوق .. قصدي في الاعلام اللي خوتونا بيه اليومين دول ..
- و نسميه ايه الجورنال بتاعك ده ؟؟
- ع الموضه يا باشا .. نسميه الثورجيه .. او نسميه ثوار التحرير .. اهو اي اسم فيه حكاية الثورة دي .. و اللي تشوفه معاليك ..
- ايوه .. و اكتب اسمي عليه اني رئيس مجلس الادارة .. برافو عليك ..
- تمام يا باشا .. اهو كده الشغل ..
- انت شجعتني و ادتني فكرة انقح .. هاعمل قناة فضائية سياسية و اجيب كام مذيع و كام مذيعة من اللي عليهم العين .. و هات يا برامج .. و هات يا خناقات و زعيق و ردح ..
- و يا سلام يا باشا لو عملت كمان حزب .. دا بقي مافيش اسهل منه دلوقتي .. حزب يكون مقاسك كده يا باشا ..
- ع البركة .. انا بالبس 45 عريض .. و يبقي يوريني سي زكي هو احسن مني في ايه ..
.. و هكذا تنتهي القصة و يولد الجورنال .. و تضيع الصحافة بين أصحاب المال و اصحاب المقال ..
ليست هناك تعليقات:
إرسال تعليق