أقسام







مجلة حراس مصر

مجلة حراس مصر
مصرية ..باقلام وطنية تحت التأسيس

صباح الخير يا بلادي .. يا كل أهل بلادي الشقيانين ..

مؤنس زهيرى يكتب  "على باب الوطن  "
------------------------------------
صباح الخير يا كل ميادين و شوارع و حواري و أزقة مصر .. صباح الخير يا 10 درب الرشيدي في الجمالية مكان ما اتولدت .. صباح الخير يا مقام أخضر صغير و أقرأ لك الفاتحة زي ما جدي كان بيقرأ و يقولي إقرا الفاتحة لسيدك البيومي و إحنا معديين عليك رايحين نصلي الجمعة .. صباح الخير يا بيت القاضي أعدي عليك مع ستي تشاور عليك و تقولي ده بيت جدي الكبير .. صباح الخير يا زقاق صغير و ضيق علي بلاطك الطينة الجميلة بعد المطر و فيك محلات السبح و البخور و إحنا رايحين سيدنا الحسين نزور و نقرأ الفاتحة لآل بيت النبي عليه الصلاة و السلام .. صباح الخير يا سور مصر الجميل فيه البوابات العالية الضخمة .. صباح الخير يا بوابة المتولي .. يا بوابة النصر .. يا بوابة الفتوح .. صباح الخير يا مصر يا جميلة .. شارع شارع .. و حارة حارة .. و زقاق زقاق .. و طوبة طوبة .. و حجر حجر .. سافرت لأكبر بلاد العالم ما لقيت في جمالكم جمال .. صباح الخير يا بلادي .. مش ممكن أسمح لأي حد ياخدك من حضني يمسح شخصيتك و يغيرك .. حتي لو كان عامل نفسه بيتكلم بإسم إسلامي ..
مصــــر .. بين إيديك يا رب و تحت رحمتك .. مصر بتاعت الغلابه اللي طافحين الكوته .. مصر بتاعت عم عبده صاحب عربية الفول .. و خالتي حسنية اللي قاعده قدام مشنة الخضار في سوق الناصرية .. و عم حلمي بياع الجرايد .. و عم جودة الفطاطري في سيدنا الحسين .. و البت إحسان صاحبة صاج البوريك أبو عجوة اللي قاعده علي أول كوبري شبرا النملة .. و أم سناء اللي قاعده من الفجر قدام صينية الجبنة القريش و المش و البيض .. و الحاج صالح كبير بوابين منطقتنا .. و عم جرجس صول المرور في ميدان الأزهار عند شارع الفلكي .. و أم سمير اللي قاعده تنضف الخضار اللي اشترته موظفة الوزارة و مستنياها تخرج الساعة 2 تسلمه لها في أكياس نايلون نضيفة و تنضيف الكيلو بجنيه ..
مصر بتاعت المصريين الشقيانين اللي مش طالبين م الدنيا إلا الستر بين إيديك يا رب و تحت رحمتك..

ليست هناك تعليقات:

المشاركات الشائعة

اعلان

مجلة حراس مصر تصميم بلوجرام © 2014

جميع الحقوق محفوظة لمؤسسة الدفاع للتنمية وحرية الاعلام والابداع ..الاراء المكتوبة مسؤلية اصحابها . يتم التشغيل بواسطة Blogger.